Íslenska ríkið kaupir vörur og þjónustu fyrir um 100 milljarða króna á ári. Í Evrópu eru opinber innkaup talin nema um 16% af vergri þjóðarframleiðslu. Miðað við þetta hlutfall má áætla að opinber innkaup á Íslandi séu um 180 milljarðar á ári, þar af kaupi sveitarfélög vörur og þjónustu fyrir um 90 milljarða á ári.

Ljóst er að áhrifamáttur opinberra innkaupa er mikill. Með því að setja skýrar kröfur um umhverfissjónarmið í opinberum innkaupum gefst tækifæri til að hvetja til nýsköpunar og virkrar samkeppni um vistvænar vörur og þjónustu á markaðinum. Um leið er stuðlað að því að draga verulega úr umhverfisáhrifum innkaupa og neyslu í opinberri starfsemi og samfélaginu öllu.

Fyrirhugað er að þróa skýra mælikvarða um vistvæn innkaup í samræmi við stefnu um vistvæn innkaup ríkisins.